د بنګله دېش په پلازمېنه ډاکه کې د سوېلي اسيا د لوبو په لړ کې د  افغانستان د باسکېټبال لوبډلې سريلانکا ته هم ماتې ورکړه.

د سوېلي اسيا په لوبو (سېف ګېمز) کې ، چې د سلواغې مياشتې پر ٩مه، نېټه پيل شوې دي، ددغه سازمان د اتو غړو هېوادونو (افغانستان، پاکستان، هند، مالديپ، سريلانکا، بنګله دېش، نيپال او بوتان ) شاوخوا  دوه زره لوبغاړي په ٢٥ بېلا بېلو لوبو کې برخه اخلي. 

د اولمپيک د ملي کمېټې وياند محمدعارف پيمان د سلواغې مياشتې پر ١٣مه، رسنيو ته وويل، چې د افغانستان او سريلانکا د باسکېټبال په يادو شويو  سياليو کې له ١٩ کلونو څخه د کم عمره ځوانانو لوبډلو برخه اخيستې وه. د نوموړي د معلوماتو له مخې، په دې سيالۍ کې افغان لوبډلې د سريلانکا لوبډلې ته د ٦٣ پر وړاندې  د ٩٥امتيازونو په ترلاسه کولو سره ماتې ورکړه.  د باسکېټبال په سياليو کې افغانستان په الف ګروپ کې دى. په دې ‌ډله کې د هند، سريلانکا او پاکستان لوبډلې برخه لري. د افغانستان د باسکېټبال لوبډلې تر دې وړاندې د پاکستان لوبډلې ته د ٥٨ پر وړاندې د ٨٥ امتيازونو په ترلاسه کولو سره ماتې ورکړې وه. په يادو شويو سياليو کې تراوسه د افغانستان د فوټبال لوبډلې هم،د هند او پاکستان  لوبډلو ته ماتې ورکړې  او سيمې فاينل ته يې لار موندلې ده.دغه راز هغه زياته کړه، چې د سوېلي اسيا په لوبو (سېف ګېمز)کې افغان لوبغاړو  تر اوسه د برونزو پينځه مډالونه، چې څلور يې په جودو او يو يې د وزن پورته کولو په برخو کې ترلاسه کړي دي.

خو محمد عارف پيمان وايي، چې د واليبال په سيالۍ کې، چې د هند او افغانستان لوبډلو ترمنځ ترسره شوه، د هند د ځوانانو لوبډلې افغانستان ته د صفر پر وړاندې په  ٣ سره ماتې ورکړه.