د ناټو په مشرۍ نړيوالو سوله ساتو ځواکونو (آيساف) د افغانستان په شمال کې د يوې نښتې په ترڅ کې د خپلو دوو سرتېرو دوژل کېدو خبر ورکړ.

دغه خبر په کابل کې د يادو شويو ځواکونو مطبوعاتي دفتر لخوا دسلواغې په ١٨مه، پژواک خبري اژانس ته په يوه رالېږل شوې خبرپاڼه کې ورکړ شوى دى .

په خبرپاڼه کې زياته شوې چې دغه سرتېري نن دافغانستان په شمال کې د وسلوالو مخالفينو د سپکو وسلو په يوه بريد کې وژل شوي دي .

سرچينې ويلي، چې دايساف د پاليسۍ له مخې دمګړۍ د وژل شويو سرتېرو تابعيت نه شي په ډاګه کولى او نه هم خبرپاڼې د پېښې دقيق ځاى په ګوته کړى دى .

خو په افغانستان کې مېشتو سوېډني ځواکونو اعلان کړى، چې د افغانستان د شمالي ولايت بلخ په مزار شريف ښار کې يې دوه سرتېري په يوه بريد کې وژل شوي دي .

دغو ځواکونو زياته کړې چې په دې بريد کې  يې دوه افسران او دهغوى يو افغان ژباړن د مزار شريف په لويديځه ساحه کې وژل شوي او يو سرتېرى يې ټپي شوى دى .

سوېډن  له ٢٠٠٢ زېږديز کال راهيسې  په افغانستان کې د ايساف په چوکاټ کې مېشت دي او دغې وژنې سره يې دوژل شويو سرتېرو شمېره ٤ تنو ته ورسېده .

د روان زېږديز کال (٢٠١٠) له پيل راهيسې په افغانستان کې د وژل شويو بهرنيو سرتېرو شمېره ٥٩ تنو ته ورسېده .

طالبانو تر اوسه ددې بريد په اړه څه نه دي ويلي، خو ددوى وياند ذبيح الله مجاهد وايي چې نن يې په کندز ولايت کې څلور الماني سرتېري وژلي دي .

جاوېد هميم کاکړ