د چين د هانکانگ فلمي نړۍ وتلى ستورى جگي چن به د راپورونو له مخې په باليووډ کې د دې سېنما له يوه وتلي ستوري (شاه رخ خان) سره په يوه فلم کې راڅرگند شي.

د راپورونو له مخې چينايي فلمي ستورى جگي چن به، چې يو نړيوال وتلى فلمي ستورى دى، په يوه هندي فلم کې د لومړي ځل لپاره ګام کښېږدي.

د هند سېنما د وتلي ستوري شاه رخ خان په رتلونکي فلم (Ra1) کې به، چې د هغه د خپلې فلمي کمپنۍ له لوري جوړېږي، جګي چن ته د يوه ساينسپوه رول ورکړل شي.

د ريډ چيليز فلمي کمپنۍ مشر په  دې اړه داسې ويلي: "موږ کوښښ کوو چې د خپل راتلونکي فلم (را ١) د يوه رول لپاره جګي چن وهڅوو. خو دا لا تر اوسه سل په سلو کې څرگنده نه ده چې هغه به په فلم کې کار کولو ته زړه ښه کړي، خو بيا هم زموږ خبرې ورسره روانې دي."

د شاه رخ خان د فلمي کمپنۍ له لوري دغه راتلونکى فلم به د يوه پياوړي افسانوي کراکټور (سوپر هيرو) پر کيسه باندې جوړ شي او د روان کال په پاى کې به نندارې ته وړاندې شي.