د امريکا د متحده ايالتونو فلمي صنعت په يوه ميوزيم کې د هندي وتلي فلمي ستوري شاه رخ خان په وياړ له موم څخه د هغه يوه جوړه شوې مجسمه پرانيسته.

شاه رخ خان د هند سېنما له نامتو ستورو څخه دى، چې له تېرو څو لسيزو راهيسې شاوخوا په (٧٠) فلمونو کې راڅرگند شوى او زيات شمېر فلمونه يې په ډېره لوړه کچه بريالي شوي دي.

شاه رخ خان د هند سينما لومړى ستورى دى چې د هاليووډ په (ميډم توسوادز) ميوزيم کې يې، چې د فلمي ستورو په وياړ د هغوى له مومو څخه جوړې شوې مجسمې پکې پرتې دي، مجسمه پرانيستل کېږي.

په دغه ميوزيم کې د زياتو وتلو امريکايي ستورو لکه جينيفر لوفز، نيکول کيډمن، جاني ډيپ، ډيويډ بيکم، بياوينسې د نورو نړيوالو وتلو ستورو مجسمې سره ولاړې دي.

د دغه موزيم د مشر راجن زيډ د شاه رخ خان د مجسمې د پرانيستنې په مراسيمو کې داسې وويل: "هاليووډ او باليووډ په فلمي نړۍ کې تر ټولو پرمختللي فلمي صنعتونه دي او د دې مجسمې په پرانيستنه سره به د دغو دوو فلمي صنعتونو تر منځ اړيکي نور هم ټينگ شي."