د هرات ښار

د مرغومي٢٧مه، ١٣٨٨، پژواک خبري اژانس

پوليسو د هرات ولايت د چشت شريف  ولسوال او څلورو نورو کسانو د وژل کېدو خبر ورکړ.

 په لوېديځه حوزه کې د پوليسو وياند سمونوال عبدالرووف پژواک خبري اژانس ته وويل چې د چشت شريف ولسوال عبدالقدوس قيام نن  له غرمې وروسته په دوه نيمو بجو له ولسوالۍ څخه د هرات ښار پر لور روان و ، چې د وسلوالو له کمين سره مخ شو.

احمدي زياته کړه چې په دغه کمين کې، چې د چشت شريف په ٩ کيلومترۍ کې د تګاب غزه په کلي کې ترسره شو، ولسوال او د امنيه قوماندانۍ د امنيت د مدير په ګډون  له  څلورو نورو کسانو سره ووژل شو.

خو د هرات ولايت د مقام د ولسواليو د چارو کار پوه شعيب معصومي وايي  چې په دغه کمين کې  د ولسوال او د امنيت  له مدير سربيره، دوه افسران او دوه پوليس هم وژل شوي او يو بل پوليس ټپي شوى دى.

معصومي زياته کړه چې د بريد کوونکيو هويت تراوسه نه دى څرګند شوى ، خو ښايي  چې د دولت وسلوال مخالفين به وي .

تراوسه د ولسوال او د هغه د ملګرو د وژنې مسووليت چا په غاړه نه دى  اخيستى .

په تېرو دوو کلونو کې دا درېيم ولسوال دى ، چې په هرات کې وژل کيږي،  دوه نورو ولسوالان هر يو د ګلران ولسوال ډاکټر ظاهر او د ګذرې ولسوال غلام حضرت وو .

د روان کال د ليندۍ په مياشت کې د رباط سنګي پخوانى امنيه قوماندان لومړى څارن عبدالکريم او د غويي په مياشت  کې د دغې  ولسوالۍ پخوانى امنيه قوماندان سمونمل عبدالرحيم عظيمى هم وژل شوي وو  او وسلوالو طالبانو د دواړو وژنو مسووليت په غاړه اخيستى وو.

احمد قريشي