د ناټو د غړيتوب د ليست څخه هالنډ لومړنى هيواد شو چې له افغانستان څخه خپل ټول عسکر باسي .

د هالنډ هيواد د وروستيو پوځونو وتل به نن (يکشنبه د اګسټ لمړۍ ) بشپړ شي.

په افغانستان کي د هالنډي ځواکونو پر ماموريت په هالنډ کي ډير جنجالونه رامنځ ته شوي و .

تير کال د دوي د ايتلافي حکومت د ړنګيدو وجه همدغه ماموريت و چي له امله يي نوي انتخابات پکي تر سره شول .

هالنډ ټول ټال ١٧٠٠ پوځيان په افغانستان کې درلودل چي د اروزګان په ولايت کې يي په زياتو نښتو کې برخه درلوده .

 که څه هم هالنډيانو ته د نورو هيوادونو په پرتله کمه مرګ ژوبله اوښته ، خو د دوى تر ټولو د ياد وړ عسکر د لوى دستريز زوى و چي په اروزګان کې ووژل شو .

د ځينو برتانوي رسنيو په اساس دا لا هم ويل شوي چي طالبانو د دي کار په تر سره کولو ډيره خوښي ښودلي .

د ناټو له خوا تر اوس په دي اړه نور وضاحت نه دي ورکول شوي ، خو خپله په اروزګان کې د هالنډي ځواکونو پر ځاى مخکي له مخکي اسټراليايي او امريکايي پوځونو ځاى پرځاى شوي دي .

د ناټو د يو شمير هيوادو د مهالويشت پر اساس کاناډا به دوهم هيواد وي چي راتلونکي کال کي به له افغانستان څخه خپل پوځونه باسي .

د يادوني وړ ده چې پولنډ هم اعلان کړى دى ،چې په ٢٠١٢ کال کې به  له افغانستانه خپل سرتيري وباسي .